2013-це иень «Раськень озкс»

 

Июлень 13-це чистэ Покш Игнатбуень Чукало велесэ ютась Раськень озкс. Меельцесь ульнесь 2010 иестэ. Анокстамотне мольсть колмо иень перть. Тей пурнавсть аволь ансяк Мордовиянь эрзятне. Озксов сакшность эрьва кодамо енкссто, косо эрить минек раськень ломантне ды омбо масторстояк! Ансяк Самара ендо ульнесть ниле автобуст ды зярыя газельть. Ламо инжеть сакшность Пенза ды Нижней енкстнэстэ. Теевезь коень коряс, Саранскойстэ Чукалов ардсть автобуст, кинень ульнесь мелезэ понгомс – весень сайсть.

 

 

Васоло эрицятнень ютксто ламот сакшность шкадо икеле, кие лоткась гостиницас, кие жо ардсь сеске Чукалов, эрясть палаткасо, кужосонть. Неть ломантне кортыть: те седеяк паро, чарькодьсак озксонть зэмензэ. Ломантнень талновтсь вейке: мекс арась озксонь ютавтомадо кодамояк куля, лиякс меремс, реклама? Бути лия енксонсетне кармасть содамо теде Интернет вельде, эсенекетне жо – ялгань-оянь пельде, телевизорсо ды ламо газетатнесэ теде эзть пачтя… Нама, бути содавольть – тей пурнавольть седеяк ламо эрзят. Койсэнь, эсенек эрзянь районтнэстэ ломантне савольть бу покш мельсэ.

Раськень Озксось – те эрзянь кезэрень кой. Сонзэ пингстэ раськесь пшкади Инешкипазонтень ознома марто. Эрьвась канды мартонзо мода ды почоды Маронть ланга. Историянь евтамотнень коряс, меельце покш Озксось Чукалсо ульнесь 1629 иестэ. Теде мейле сонзэ эзть мере ютавтнемс. Одс вельмевтезель 1999 иестэ. Ней сон ютавтови колмо иес весть. Истя, Озкс ульнесь 2004, 2007, 2010 иетнестэ. 2004 иестэ МР-нь Прявтонть Указонзо коряс Раськень Озксонть кармась государственной статусозо.

Озксонть ушодовомсто весе ломантненень пшкади Инязорось (Г.Д.Мусалев). Сон энялды пурнавомс вейс, аштемс сэтьмечисэ, а кортамс, зярдо ушодовить озномань валтнэ ды Инешкипазонтень пшкадемась. Энялды евтамс Озксаванть мельга валтнэнь ды видестэ кепедемс кедтнень. Седе тов гайгезеви Тюштянь торамось. Сон терди эрзятнень вейсэндявомс.

Те шкане Маронтень юты Озксава ды лездыцянзо. Сынь кандыть мартост кши, медь ды штатол. Озксавась яволявты атятнень лемест, конат кармить кирвазтеме Раськень Штатолонть. Маронтень ниле ендо кузить атят. Тедеде Штатолонть кирвазтеме кармавтызь 2013-це иень А.П.Рябовонь лемсэ лауреатонть, чувтосто керсицянть П.В.Рябовонь. Те штатолось – раськень вейсэндямонь тешкс, парос кемема. Сталмозо – малав 800 килот, серезэ – колмо метрат. Штанть лездасть пурнамс ламо эрзят.

Озксавась пшкади Инешкипазонтень Ознома марто. Неть валтнэнь минек ломантне арсизь-ладсизь зярыя пингеде икеле. Бути сынст кунсоломс, токави седеть, а кадоват мельтеме. Зяро эйсэст вий, кемема, смусть!

Неть валтнэде мейле Озксавась энялды ледстямс сетнень, кить арасть ютксонок, минек покштятнень-бабатнень. Таго евты ознома валт. Озксаванть тердеманзо коряс Маронтень лисить эрзянь ине ломантне, конат уш тоначисэ. Сынст невтить эрзянь ды мокшонь национальной театрань актертнэ. Истя, Маронтень лисить Тюштя, ушмодеесь Пургаз, ушмодеесь Баюш Разгильдяев, кона 1612е иестэ изнинзе ногайтнень, С.Разинэнь шкасто ушманонь ветицясь Эрзямасонь Олена, Боляень Акай, Василень Несмеян, Алексеень Кузьма, Чапаень Василь, М.Е.Евсевьев, А.П.Рябов, С.Эрьзя, С.Люлякина, Д.Т.Надькин, Йовлань Оло… Весе сынь евтасть валт. Саемга, содавикс ученоесь М.Е.Евсевьев мерсь: «Эрзянь келесь мазый. Карминдерятано эрзятненень ды мокшотненень сёрмадомо ды печатамо човорязь «мокшэрзянь» кельсэ, кияк кортамо-ловномо а карми. Кода сёрмадтадо, истя сёрмадодо седе товгак: эрзятне – эрзякс, мокшотне – мокшокс. Казема мельганок сыцятненень культура, сеть мазычитнень, конатнень таштасть покштянок аволь ве пингень перть. Весемеде пек мелявтан эрзянь келенть кувалма».

Седе тов Маронть перька юты сока марто алаша. Истя жо састыне ютыть атятне. Сынь колмоксть сюконить Маронтень, пульзить, мейле паласызь моданть.

Коень коряс, эрьвантень эрявсь самс тей мода марто (саемс сонзэ эсеть эрямо таркасто) ды почодомс Маронть ланга. Васня моданть почодыть лия енкссто сазь инжетне. Мейле весе кундыть кедте кедьс ды теить покш кирькс. Гайгезеви «Вирев молян» морось. Сонзэ морамо кундыть весе пурнавозтне. Кирьксэсь те шкане яла келейгады ды келейгады, мейле панжови омбоце кирькс. Весе вейсэ вастовить кужонть куншкасо, евтыть вейкест-вейкест туртов лембе валт ды пижнить «эрзя», «эрзя»!

Раськень Озксонть пингстэ пурназель Атянь Эзем. Сонзэ юрсо ульнесть минек республикань ды томбалень эрзятне. Тесэ кочкавсь Инязор, сонзэ полавтыцянзо ды чирязт. Салавань кочкамотнень коряс Инязорокс кармась Г.Д.Мусалев. Сон евтась сюкпрянь валт ды алтась седе товгак ветямс эрзянь келень, культурань ванстома тевтнень.

Теде мейле панжовсь сонсь Раськень Озксось. Атянь Эземень ломантне ды инжетне тердевсть сцена лангс. Лембе валт пурнавозтненень евтасть Саранск ошонь мэрэсь П.Н.Тултаев, Покш Игнатбуень прявтось Т.Н.Полозова ды лият.

Вана уш зяроце ие «Руця» фондось ютавты эрзянь авань сехте мазый оршамопелень конкурс. Фондонь прявтось – Мурманск енксонь эрзянь церась Борис Ерюшов. Сон ды Т.М.Ковалева аштить жюрисэ. Кунсолыть эрзянь аватнень, конат евтнить эсь палядост, кода стызь ды викшнизь, зяро шка ютавтсть. Эряви меремс, те пелькстамонтень иеде иес явить мель ламо ломанть. Сынст ютксо цераткак невтнесть панарост. Истя, васенце таркась максозь Надежда Родионованень (Саранск), омбоцесь – Надежда Володинанень (Орданьбуе), колмоцесь – Раиса Зорькинанень (Саранск).

Теке шканть перть важодсть декоративно-прикладной творчествань, ярсамопелень выставкат. Инжетнень каванясть эрзянь раськень ярсамопельсэ: прякасо, пачалксесэ, каймаксо. Симдсть позадо. Микшневсть эрзянь книгат, валкст, сувенирт, моро марто дискт. Пенза енксонь инжетне усксесть миемс эрзянь тешкс марто кизэнь панарт ды лия эрьва кодат сувенирт. Сынь уш свал бажить кецявтомс ломантнень.

Ламо од ломанть пурнавкшность «Тюштянь налксемат» кужинесэнть. П.В.Мигунов ветясь церынетнень ютксо пелькстамот. Тесэ варчнесть виест чочконь кепсемасо, пеелень, узерень ертнемасо, мешоксо тюремасо, налсо леднемасо, бороцясть. Нама весе изницятне казевсть.

Кужодонть ве ено аштесть 26 котелт. Сынст эйсэ пидевсь букань тантейдеяк тантей ямось. Тесэ сонзэ лемдить шурпакс. Каванявсть весе ломантне.

Вана мезе кортыть Озксонь коряс инжетне.

Е.Н.Забатурина, Саранскоень 26-це лицеень тонавтыця:

– Мон рузава. «Раськень Озкссто» маринь эрзянь келень тонавтыцянть А.А.Данильчевень пельде. Ловнынь Интернетстэ те кенярксчиденть, ломантнень мелест сонзэ коряс. Куш а содан кель, ялатеке бажинь молемс озксов. Зярдо пачкодинь тов – неинь покш пакся, конань куншкасо аштесь Штатол. Те шкане самай кужонтень састь эрьва костонь инжеть. А евтавияк, кодат мазыйть аватнень лангсо палятне! Мельспароль содамс: тей састь Россиянь эрьва кодамо енкссто. Тесэ теевинь содавиксэкс Казахстанонь, Финляндиянь, Пензань, Самарань, Марий Элэнь инжетнень  марто. Пек кецявтымим кирьксэсь, ков пурнавсть весе ломантне. Мелезэнь тусь «Торамань» морамось, кунсолынь сынст седеень чавозь. Истя жо дивакс марявсть покш нурямотне. Чинь перть тосто марявсть эйдень кенярксов вайгельтне.

Тесэ эрьванть каванизь селянкадо ды букань ямдо, конань анокстызь теске жо, паксясо. Те чистэнть теевинь содавиксэкс ламо ломань марто. Теинь фотот ды видеот, конатнень карман тевс нолдамо школасо важодемстэ.  Пек кецян истямо таркав молеманть коряс. Тосто самодо мейле евтнинь весе ялгатненень ды малавикстнэненень Раськень озкстонть. Ней сыньгак арсить молемс озксов. Содан: колмо иень ютазь мартон молить эште ялгат. Евтан седейшкавань сюкпря Раськень Озксонь пурныцятненень!

А.Волгин, сакшнось Татарстанонь Набережные Челны ошсто:

– Раськень Озксов сынь омбоцеде. Мельс тусь истя жо, кода 2010-це иестэяк, паряк, седеяк пек. Ней сынь лелянь ды ялаксом марто. Сынь явить покш мель эрзянь историянтень, келентень. Ардынек чинь перть. Сюкпря, Покш Игнатовасо килангсо ульнесть невтевкст (указательть), ков велявтомс кужонтень. Пачкодинек уш зярдо чополгадсь. Бути а улевельть невтевкстнэ – емавлинек-кадовлинек. Эзинь учнеяк, паксясонть вестэнть кармить истя ламо ломанть. Тесэ ладязельть зярыя палаткат. Пек дивавтымим, зярдо валске марто стязь, ушосо неинь удыця. Эрзянь церась венть ютавтызе истяк, кода мерить, менель ало. Неявсь, тень кувалма сон аштесь мельспаросо.

Ускинь мартон мода, конань туия Ленинград алдо «Невский пятачок» таркастонть. Ине Отчественной войнань шкане тосо мольсть виев тюремат, чавовсть ламо ломанть. Евтаса, се таркасонть ладязь плита, косо ледстявить Мордовиянь чавовозь солдаттнэ.

Те Озкстонть мейле ледстнематне кармить эждеме седей кувать шкань перть. Мон одс вастовинь тесэ малавикс ялган марто.

ТатьянаМаторкина

«Эрзянь правда»

Ушесь/Ушось

Александр Николаевич Головин эри Башкортостансо, Ермекеевской райононь Од Сулля велесэ. Сон эрзя, роботы Белебеевской ловсонь комбинатсо, ловсонь анокстамонь отделсэ. Истя жо вети эрзянь национальной центранть. Ванна мезе ёвтнесь сон эсь тиринь веледензэ.

Тов

Чипазонтень - эрзятне ды мокшотне явсть эсь эрямосост пек покш, бути а васенце тарка. Те и чарькодеви чись макссь валдо, пансь чоподанть, сон лездась сокицянтень-видицянтень.

Тов

Кузбассо панжовсь эрзянь койтнень-кирдатнень вельмевтема куро. Курось панжовкшнось Николаевка велень Культурань кудонть юртсо. Те Покшчинть панжомо сакшность инжеть Кемерова, Новокузнецк ошстояк.

Тов
Смиротворец 2011
вебмани